Category: Uncategorized

ГРАДОНАЧАЛНИКОТ НА ОПШТИНА БУТЕЛ ДЕЛ ОД ИНТЕРНАЦИОНАЛНИОТ ДЕН “СО ВЕЛОСИПЕД ВО ЗИМА”

Денеска, Општина Бутел се приклучи кон иницијативата за одбележување на интернационалниот ден: ,,Во зима со велосипед на работа,,.

Градоначалникот Велимир Смилевски и дел од општинската администрација пристигнаа на работа со велосипеди наместо со автомобили. Исто така, и за останатите активности на терен и за посетата на училиштето ,,Иднина,, беше употребен велосипедот.

Инаку, градоначалникот Смилевски ја поддржува оваа глобална иницијатива за поддигнување на свеста за придобивките од користењето на велосипедот како превозно средство до работа и до училиште во текот на целата година. Токму затоа градоначалникот вети дека во иднина секој петок ќе доаѓа на работа со велосипед.

IMG 0013

ОПШТИНА БУТЕЛ ИЗБРА ПРЕТСЕДАТЕЛ НА СОВЕТ

На денешната петта седница на Советот на Општина Бутел за претседател беше избран досегашниот претседавач, Мирче Тодоровски. Тој е од листата на ВМРО ДПМНЕ, но за него гласаа осумте советниците од СДСМ и еден од ДУИ, а против беа преостанатите седум советниците на ВМРО ДПМНЕ и советникот од БЕСА.

Инаку, поминаа сите точки од дополнетиот дневен ред, а ги издвојуваме следниве одлуки:

Ќе се воведе двосменско работење на градинките за 35 дечиња кои ќе бидат сместени во централната градинка на ЈУ ,,11 Октомври,, во Скопје Север.

Исто така, Советот го избра Саша Комненовиќ за нов командир на полициската станица во Бутел1.

Избрани се нови членови на училишните одбори во сите основни училишта ( претставници од општината), како и членови во Управниот одбор на градинката.

Доненсен е годишниот план за енергетска ефикасност на Општина Бутел за 2018 г, програмата за отпад за 2018 г. програмата за работа на Советот на општина Бутел за оваа година

ИНФРАСТРУКТУРНА ГРАДЕЖНА ОФАНЗИВА ВО БУТЕЛ

Изградба на неколку локални улици, подготовки за градба на булевар што ќе поминува низ општината и негово реализирање, нови училишта и градинки се само дел од проектите што наредниве години ќе се реализираат во општината Бутел. Градоначалникот Велимир Смилевски најавува и разработување на индустриските зони во општината, но и грижа за екологијата, културата и спортот во општината, а секако во фокусот ќе бидат и најмладите жители на оваа општина. 

Изминативе неколку месеци беше поставено ново улично осветлување на кракот од булеварот,Македонско-косовска бригада до Смилевска, именуван како Словенија 03. Станува збор за голем зафат, бидејќи се поставени 21 метален столб, со височина од 4,5 м, на исто толку бетонски фундаменти. Инсталирана е нова подземна електрична инсталација, која ги напојува натриумовите жолти светилки со јачина од 70 вати.
– Овој проект е многу важен не само за стопанските објекти што се наоѓаат по должината на улицата туку и за граѓаните, особено за учениците што ја користат одејќи кон училиштето и кон дома. Кога сме кај осветлувањето, да додадам дека правиме целосно сервисирање на постојното улично осветлување. Правиме промена на прегорените светилки, фасонки, заштитни стакла, придушници, осигурувачи, трафоа и сѐ што е потребно за да имаме ефикасно улично осветлување на целата територија на општината – истакнува градоначалникот на општината Бутел, Велимир Смилевски.

Од кабинетот на градоначалникот исто така информираат дека општината успеа да изгради и две улици: крак од улицата 3 во Визбегово и крак од улицата 30 во Љуботенски Пат.  Нивната вкупна должина изнесува околу 400 м, а улицата во Љуботенски Пат доби тротоар во должина од 190 м, од бекатон-плочки, обрабен со големи и мали рабници. Останува да се изврши нивното асфалтирање, веднаш штом ќе почнат со работа асфалтните бази.

Кога е во прашање Бутел, треба да се спомене и новата меѓународна манифестација на општината Бутел – есенскиот базар на домашни ракотворби „Занаетчиски колаж 2017“, која ќе стане традиционална. Има и други активности што се реализирани за помалку од два месеца, како што беше големата акција за чистење на општината Бутел во рамките на чистењето на Скопје.
Сепак, значајно е што Советот на општината Бутел го изгласа буџетот за 2018 г.

– Многу работа стои пред нас. Идеите, потребите и барањата на граѓаните се неисцрпни. Во текот на зимските месеци ќе ги правиме приоритетните планови и подготовки за проектите што се од суштинско значење за граѓаните и за општината Бутел  – истакнува градоначалникот Смилевски.

Таков проект, кој е од исклучително значење за сите граѓани, несомнено е изградбата на втората фаза на булеварот Христијан Тодоровски Карпош, како и изградбата, односно проширувањето на булеварот Босна и Херцеговина.
– Ќе почнеме со изградба на нова водоводна мрежа за Љубанци и Љуботен, атмосферска и фекална канализација, каде што е приоритетно потребно. Ќе ги развиваме и ќе ги јакнеме капацитетите на индустриските зони Визбегово, Расадник и Љуботенски Пат, бидејќи преку нивното работење ќе се обезбедат развојот и иднината на општината. Но она што сакам да го истакнам е дека грижата за младите ќе биде реализирана преку конкретни проекти, како за оние од предучилишна возраст, така и за училишната младина.
Претстои изградба на ново основно училиште во Визбегово и едно помало во Љуботен, во долниот дел од селото, како алтернатива за премостување на оддалеченоста на постојната училишна зграда, за да им се помогне на учениците да ги надминат своите проблеми, особено во зимскиот период.

Ќе се обидеме да ги решиме и потребите од спортска сала во Љуботен, се разбира претходно треба да се решат имотноправните работи на градежната парцела каде што ќе се гради спортскиот објект –  додава градоначалникот Смилевски. Тој вели дека треба да се изградат и две детски градинки, кои се ургентно потребни во населбата Бутел 1 и во Визбегово. Планирани се и многу други проекти чија реализација ќе зависи од можностите и капацитетите на општината Бутел.

НАГРАДЕНИ НАЈУБАВО УКРАСЕНИТЕ ДВОРОВИ 2018 ОПШТИНА БУТЕЛ

Денеска, 05.01.2018 г. (петок), градоначалникот на општина Бутел, Велимир Смилевски ги додели наградите за трите најубаво украсени дворови, по повод новогодишните и божиќните празници.

Оваа година жири комисијата  составена од вработени во општината, одлучи да додели три први награди, со цел да го поттикне натпреварувачкиот и естетскиот дух кај граѓаните на општина Бутел.

Првонаградени се: Денчо Јосимов за креацијата од украси и светилки со наслов ,,НОВОГОДИШНА И БОЖИЌНА МАГИЈА,,, Сашо Тодоров за неговиот двор кој е украсен во стилот на ,,НОВОГОДИШЕН ПАНАЃУР,, и Евица и Мирко Мариќ за нивниот украсен двор и куќа со светилки во бела боја заради што нивната креација носи наслов ,,НОВОГОДИШНА БЕЛА УБАВИНА,,.

Сопствениците на трите најубаво украсени дворови за новогодишните и божиќните празници 2018, наградени се со по 5 000,00 ден. а  добија и специјални благодарници од општина Бутел. Двајца од наградените, Мирко Мариќ и Сашо Тодоров, средствата ќе ги донираат во хуманитарни цели, а Денчо Јосимов ќе ги вложи во нови украси и светилки за наредната нова година.